Biibili oqarpoq, "Nanisassaatippunga uannik ujarlinngitsunut, takutippunga uannik apeqqutiginninngitsunut". Immaqa oqarputit, "Allakkaniittoq taanna qanoq isumaqarpa?" Naak piffinni kukkusuni akissummik ujarleraluartutit, apeqqutinik kukkusunik, aqqutikkullu kukkusukkooraluaruit, taava Jiisusip tusassavai, eqqortukkullu aqullutit atorfissaqartinnerpaasannik tunissavaatit. Arnap imertartarfimmi Jiisusi naapikkamiuk, assigiinngitsuni attaveqarfigisamini akissutissanik ujarlerpoq. Arnaq tallimariarluni katissimasuugaluarluni avinnikuusimavoq, angutillu arfernanni ineqateqarluni. (Tak. Joh 4,18)

Zakæusip Jiisusi naapikkamiuk pigisatigut akissutinik ujarlertuuvoq. "Tassaniippoq angut Zakæusimik atilik, ilanngaaserusuuneq pisooq. Taassuma Jiisusi inuttarsiumagaluarpaa..." (Luk 19,2-3)

Paulusip Jiisusi naapikkamiuk, upperisarsiornikkut akissutinik ujarlerpoq. Angutip aajukua suliffiginikuusai: "Arfineq-pingasunik ulloqarlunga kipineqarpunga, inunnguuseralugu israelikkuuvunga, Benjaminimit naggueqarlunga, hebræeriuvunga hebræerinik siuaasaqartoq, farisiiariusimavunga inatsisinik maleruaaqqissaarniartoq, ilungersuutigalugu ilagiinnik qinuginnittuusimasoq, iluartuunissaq inatsisiniittoq eqqortinniarlugu assuarnaatsuusimasoq". (Fil 3, 5-6)

Arnaq imiisiviup eqqaaniittoq assigiinngitsunik aappaqarnerup naammagisimaarinnitsissimanngilaa, Zakæusilu pisuussutit naammagisimaarinnitsissimanngilaat, Paulusilu upperisarsiornerup naammagisimaartissimanngilaa. Illillu tamakkua aamma naammagisimaalersissinnaanngilaatsit. Taava suup? Jiisusimut attaveqarnerup! Taanna ilinnut ullumikkut oqarpoq: "Tillinniaq tikiuttarpoq tillinniaannarluni, toqutsiniaannarluni aserorteriniaannarlunilu. Uanga tikiuppunga inooqqullugit naammangaartumillu pissaqaqqullugit". (Joh 10,10) Jiisusi akissutaavoq!